BLOGGER TEMPLATES - TWITTER BACKGROUNDS

Thursday, August 5, 2010

Ang Isla’ng Gimahal Ko!

By Ramie L. Bulaybulay Jr.

Siquijor, Siquijor

Ikaw ang yuta’ng ako’ng gihandum

Ang isla’ng kanunay ko’ng higugmaon,

Wala’y makalupig sa imong katahum

Tungod kay kanunay kamang amumahon.

Ikaw ang gigikanan sa ako’ng paglaum

Bisan na kon ikaw usa ka yuta’ng batuon,

Wala’y sama ang imong mga talan-awon

Nga daw susama sa usa ka bililho’ng bituon.

Ikaw usa ka gasa gikan sa Kahitas-an

Nga dili mabayran bisan unsa paman,

Kay ang imo’ng bugti susama sa usa ka kinabuhi

Nga wala’y maitandi bisan unsa’ng bahandi.

Ikaw ang tinuod nga yuta’ng gipanaad

Kay daghan ang kanimo nag-alagad,

Salamat sa wala’y pu-as nga pagpaambit sa mga bahandi mo

Ilabi na sa pagpapuyo ug pag-amuma kanamo.

Dili masukod ang kahigayunan nga gihatag mo

Tungod niini magpabilin kang tipik sa among tagsa-tagsa ka kinabuhi,

Kay ikaw lang gihapon ang nag-inusarang yuta sa amo’ng kasing-kasing

Ang isla’ng mao’y tinubdan sa kaalam nga hinagiban sa amo’ng kalampusan

Apan bisan sa mga kaayo nga gipaambit mo kanamo

Gitamas-tamasan ug gidagmalan lang gihapon ka,

Bisan wala sila’y igong kapasikaran

Inanay nilang giguba ang imong bulawanong ginghari-an.

Apan ako ang musaad ug manumpa kanimo

Nga ako mubalik sa tukma’ng panahon,

Og pakgangon ang pagpasakit diha kanimo

Tungod kay ikaw ang isla’ng gimahal ko!